Drejtuesit garantojnë se eliminimi nga Liga e Kampioneve nuk do të ndikojë në të ardhmen e trajnerit anglez.
Rafael Benitez ka marrë garanci se nuk i rrezikohet vendi i punës edhe pas eliminimit të Liverpulit nga Liga e Kampionëve, mbrëmjen e së martës. Drejtori i menaxhimit të klubit, Kristian Purslov, i ka dhënë mbështetjen e tij të plotë trajnerit spanjoll, edhe pse Liverpuli nuk arriti të kualifikohej për herë të parë në 1/16 e këtij turneu gjatë pesë viteve të drejtimit të Benitezit. Fitorja 1-0 kundër Debrecenit në Budapest nuk mjaftoi për të siguruar progresin, pasi Fiorentina fitoi kundër Lionit dhe nuk i dha shans Liverpulit t’i afrohej. Fiorentina fitoi 1-0 falë golit të Huan Vargas në pjesën e parë me penallti dhe u dha fund shpresave të të kuqve për më tej. Pas një sezoni të keq deri tani, presioni është rritur edhe më shumë ndaj Benitezit, pasi shanset e të kuqve për të fituar kampionatin janë thuajse të shuara, ndërsa Liga e Kampionëve mori fund. Megjithatë, Purslok ka thënë se Benitez ka përkrahjen e plotë të bordit dhe ka thënë se eliminimi nga Liga e Kampionëve nuk do të jetë nokauti financiar për Liverpulin. “Eliminimi nuk ka pasoja për Rafën. Ai ka nënshkruar një marrëveshje pesëvjeçare vetëm tetë muaj më parë dhe ka rrugë të gjatë për të bërë. Ne nuk mund të prishim planet tona afatgjata për shkak të njerëzve. E dimë që tifozët duan që të jemi më lart. Nëse do të shkojmë në Ligën Europa, do të kemi tri ndeshje në fushën tonë dhe financiarisht do të marrim të njëjtat të ardhura nga biletat. Sigurisht që ndihemi shumë keq që nuk jemi kualifikuar për në raundin tjetër të Ligës së Kampionëve sepse mezi prisnim ndeshjet me eliminim. Nëse arrijmë të kemi sukses në Ligën Europa, mendoj se mund të arrijmë të njëjtat shifra të ardhurash si në Ligën e Kampionëve, në mos më shumë. Sigurisht që do kemi ulje të ardhurash nga eliminimi, por jo për sa u përket biletave.” Goli i minutës së katërt nga David Ngog i dha Liverpulit fitoren e parë në tokën hungareze, por trajneri i Liverpulit ka kujtuar dy golat e vonë që i kushtuan eliminimin Liverpulit në ndeshjet kundër Lionit: “Nëse u hedh një sy ndeshjeve, diferencën e bënë vetëm dy gola. Nuk ishim më keq se të tjerët, por paguam për gabimet kundër Lionit. Eshtë pjesë e futbollit, por nuk mund të kontrollohet. Ne bëmë gabime në minutat e fundit, prandaj faji është i yni. Më vjen shumë keq, sepse patëm shumë raste në çdo ndeshje dhe mund t’i kishim fituar ato. Kemi qenë të fortë vitet e fundit në Ligën e Kampionëve. Njerëzit e mendojnë të lehtë kualifikimin në këtë turne, por nuk është. Ne mund t’ia kishim dalë mbanë edhe këtë vit dhe tani duhet të jemi optimistë. Më pëlqen të fitoj çdo ndeshje, që të jemi sa më mirë në çdo turne, por ndihem keq për lojtarët, tifozët dhe stafin. Më vjen shumë keq për të gjithë. Të dhemb në zemër mënyra se si u eliminuam. Por kjo nuk ndryshon gjë dhe duhet të mendojmë për kompeticionin e ardhshëm.” Pas kësaj ndeshjeje vjen derbi kundër Evertonit në Premier Ligë dhe Benitez ka shtuar: “Jemi në një situatë të keqe dhe nuk mund të fitojmë Ligën e Kampionëve, prandaj duhet të bëjmë çmos në ndeshjen që vjen. Ka shumë skuadra që nuk arrijnë as në Ligën e Kampionëve.”