ëse dëshironi të ndiheni në formë çdo ditë, dëgjoni 12 minuta muzikë. Kjo është terapia që u këshillon profesor Predrag Mitrovic nga Universiteti i Beogradit pacientëve të sëmurë nga zemra. Një studim i gjatë, i filluar që në vitin 1990, ka konfirmuar efektet mirëbërëse mbi sistemin e qarkullimit të gjakut. Pas 19 vitesh studime, rezultatet janë paraqitur në kongresin e përvitshëm të Shoqërisë Europiane të Kardiologjisë. 370 pacientët e sëmurë me zemër, që gjatë viteve të fundit kanë dëgjuar të paktën 12 minuta muzikë në ditë, janë më pak të sëmurë nga hipertensioni, numri i rrahjeve të zemrës është ulur dhe sëmundja nuk u është përsëritur më, në krahasim me 370 pacientët e tjerë që nuk iu nënshtruan terapisë për të dëgjuar muzikë në darkë.

Efekte mbi tensionin

Ideja e muzikës si kurë, profesor Mitrovic-it i erdhi në vitin 1985, kur gjatë shërbimit në repartin e onkologjisë pediatrike i bëri një operacion të vështirë një vajze, e cila gjatë kohës së ndërhyrjes dëgjonte muzikë dhe ndryshe nga të gjithë bashkëmoshatarët e saj, nuk dha asnjë shenjë dhimbjeje. Që atëherë, Mitrovic, edhe duke u ballafaquar me studime analoge mbi vetitë terapeutike të muzikës, iu dedikua totalisht për të parë ndikimin që kishte mbi presionin e gjakut. Sipas përshkrimeve të profesorit, muzika që duhet dëgjuar, duhet të jetë klasike, por disa pacientë kanë treguar se e kanë zëvendësuar atë me muzikë pop. Profesor Mitrovic ka thënë se shijet janë subjektive dhe se më e rëndësishmja është që muzika të perceptohet si pushim. Por ndryshe nga ky pohim, Mitrovic është shprehur për revistën e specializuar “Heart Wire”, se jo të gjitha rrymat e muzikës mund të kenë veti terapeutike mbi shëndetin e njeriut.