Kriza institucionale ka ndikimin kryesor për ngecjen momentale të Kosovës në aspektin e njohjeve nga vendet e tjera.
Kështu ka thënë drejtori i Institutit Kosovar për Kërkime dhe Zhvillimeve të Politikave, Krenar Gashi.
“Mungesa e njohjeve të shtetësisë është pasojë e ngecjes së jetës institucionale në Kosovë. Prej krizës qeveritare që e kemi pasur, kemi mbetur pa ministër të jashtëm dhe pa një përfaqësim intensiv diplomatik. Më pas edhe ato vende që ndoshta e kanë njohjen e Kosovës në agjendë, kanë pritur që të shohin se çka po ndodh në Kosovë gjatë procesit zgjedhor”, ka theksuar Gashi.
Qëkur Kosova e ka shpallur pavarësinë e saj më 17 shkurt të vitit 2008, atë e kanë njohur gjithsej 72 vende. Shteti i fundit që e ka njohur shtetin e Kosovës është Tuvalu, e bërë atë më 18 nëntor, shkruan Koha Ditore.
Drejtori i KIPRED-it, element ndikues tjetër të pauzës së njohjeve e ka lënë raportin e të dërguarit të Këshillit të Evropës, Dick Marty, për pasojat e të cilit ka thënë se akoma më shumë mund të shihen më vonë.
“Pesha që e ka Këshilli i Evropës dhe reputacioni i këtij institucioni, pa dyshim se e ka dëmtuar rëndë imazhin e Kosovës. Ky dëmtim perceptohet më i rëndë te vendet të cilat nuk kanë pasur të qartë sa i përket njohjes së Kosovës, ndërsa u ndihmon shumë në lobim kundër njohjeve armiqve të shtetësisë sonë”, ka arsyetuar ai.
Ndërkohë, Ibrahim Gashi, nga AKR, një parti kjo që vazhdimisht është përplasur me MPJ-në në terrenin e lobimit, ka thënë se kriza politike në vend, por edhe raporti i Dick Marty kanë bërë që numri i njohjeve të Kosovës të mos shtohet.
E zëvendësministrja në largim e Punëve të Jashtme të Kosovës, Vlora Çitaku nuk e ka parë shkaktare të heshtjes së njohjeve punën e krizës institucionale, por atë të raportit të senatorit të Këshillit të Evropës.
