Autorët dhe aktorët e “Portokallisë”, spektaklit më të dashur të humorit në ekranet shqiptare, janë takuar me studentë të universitetit “Aleksandër Moisiu” të Durrësit, në kuadër të turit që kanë ndërmarrë për të diskutuar mbi humorin dhe sezonin e ardhshëm të spektaklit, me synimin për ta sjellë atë sa më pranë kërkesës dhe dëshirave të teleshikuesve.

Gjatë këtij bashkëbisedimi, u shua edhe kurioziteti i mjaft prej admiruesve të spektaklit për ata që do e drejtojnë atë gjatë sezonit të ri. Regjisori Altin Basha deklaroi se moderatorët e ardhshëm të “Portokallisë” do të jenë këngëtarja e mirënjohur Eneda Tarifa dhe aktori Salsano Rrapi. Studentët duartrokitën përzgjedhjen e kësaj dysheje që do të drejtojë spektaklin përgjatë sezonit të ri, dyshe që e kaloi me sukses provën në fundvit. Studentët janë ndier mirë në shoqërinë e atyre që prodhojnë dhe aktrojnë në spektaklin që ata vetë e përcaktuan si më të mirin e deritanishëm në vend. Biseda u përqendrua në sugjerime, vlerësime e vërejtje lidhur me temat e trajtuara dhe mënyrën e trajtimit të tyre, të cilat u debatuan dhe u mirëpritën nga stafi i “Portokallisë”. Vendosja e problemeve në shkolla dhe auditorë në fokus të humorit ishte një nga sugjerimet më të mbështetura që iu bë regjisorit Basha dhe skenaristit Kozma.