Barcelona ka shënuar fitore ndaj Almerias me rezultat 3-1, natyrisht më vështirë nga sa ishte pritur, por e cila mjaftoi për t’iu afruar kështu gjithnjë e më shumë titullit në La Liga.
Ishte një pjesë e parë e dominuar nga Barcelona e cila përfundoi pa gola, me një Almeria që në Camp Nou erdhi për të mos bërë thjeshtë turizëm.
Real Madridin për tre minuta në garë për titull e riktheu Corona, i cili realizoi për epërsinë e mysafirëve në minutën e 50-të, pas një kundërsulmi të shpejtë. Më parë David Villa qëlloi shtyllën.
Dhe të alarmuar nga kjo situatë (53’), Lionel Messi realizoi nga pika e bardhë pas një ndërhyrjeje të portierit Diego Alves në David Villën, e cila dhe detyroi gjyqtarin të akordonte penalti.
Blaugranët vazhdojnë me presionin dhe pas një goditjeje nga këndi të ekzekutuar për mrekulli nga Lionel Messi, më së miri në zonë u gjend Thiago Alcantara i cili realizoi me kokë për epërsinë prej 2-1. Formalisht në fund realizoi për 3-1 futbollisti më i mirë në planet, Lionel Messi (90').
Barcelona sigurt është duke shkuar drejt titullit me 84 pikë, tetë më shumë se Real Madridi në pozitën e dytë. Me shtatë javë pa përfunduar La Liga, vetëm befasia më e madhe mund të bëjë që Barcelona ta humbasë titullin, por sipas të gjitha gjasave gjithçka do të vendoset të shtunën e ardhshme kur dhe zhvillohet El Classico në Santiago Bernabeu.
