UEFA ka vendosur që ta dënojë me pesë ndeshje mos prani në stol, trajnerin e Real Madridit, Jose Mourinhon, pas komenteve kontraverse në konferencën për shtyp me të mbaruar gjysmëfinalja e parë mes Real Madridit dhe Barcelonës në Santiago Bernabeu.
Jose Mourinho e akuzoi UEFA-n se nuk po e ndjek parimin e reciprocitetit dhe se po i ndihmon Barcelonës me anë të gjyqtarëve. Ai bëri akuza të rënda, të cilat për organin më të lartë të futbollit evropian ishin të pa pranueshme.
“Trajneri i Real Madridit, Jose Mourinho, i cili ishte përjashtuar nga ndeshja e parë gjysmëfinale dhe më pas dha një deklaratë të pa matur, është suspenduar për pesë ndeshjet e ardhshme në garat evropiane, për të cilat ai në rastin e kundërt do të ishte në pankinë”.
“Mourinho nuk do të jetë i pranishëm në stol në tri ndeshjet e ardhshme në garat evropiane, pasi në suspendimin prej pesë ndeshjeve përfshihet edhe ai i kryer tashmë ndaj Barcelonës në Camp Nou. Ndeshja e pestë është me kusht në rast se përsëritet një veprim i tillë nga portugezi brenda tri viteve të ardhshme. Ai po ashtu është dënuar me 50 mijë euro”, shkruan në komunikatën e UEFA-s.
Nga ana tjetër prapa nuk ka mbetur as Real Madridi, që me anë të një komunikate konfirmoi apelimin e këtij vendimi.
“Real Madridi beson se ky dënim ende vuan nga defektet e njëjta që nga fillimi i këtij rasti disiplinor, që i pamundësoi trajnerit tonë të mbrohej, pasi nuk janë ditur pikat kyçe të këtij rasti disiplinor. Real Madridi do ta apelojë vendimin në UEFA”, shkruan në komunikatë.
Edhe Real Madridi është dënuar me 20 mijë euro nga UEFA për sjelljen jo të mirë të tifozëvë në ndeshjen e parë ndaj Barcelonës.
