Popullariteti i fillimit i rrjetit shoqëror Google+, që në disa ditë të para të prezantimit publik u rrit aq shumë, në javën e fundit është shkrirë për 60 për qind. Kështu të paktën pohon kompania analitike Chitika, e cila ka përcjellë qarkullimin në Google+ para dhe pas hapjes së këtij shërbimi për regjistrim për të gjithë të interesuarit.

Shfrytëzuesit pohojnë që Google i ka zmbrapsur nga rrjeti i vet me suspendimin e profileve me emra të rremë ose të çuditshëm që mund t’i bëjë jo të qasshme edhe disa shërbime të tjera si Picasa Web Albums, si dhe që në Google+ thjesht s’ka se çfarë të bëhet. Po ashtu, kjo kompani nuk lejon reprezentimin e bizneseve dhe as çiftet.

Kjo është edhe një dëshmi që rrjeti i ri shoqëror nuk mund të rritet me zor, vetëm pse paraqet një risi dhe konkurrencë ndaj Facebook, por vetëm nëse ofron mënyra vërtet të reja të komunikimit të ndërsjellë – dhe edhe atëherë vetëm nëse edhe miqtë e tyre fillojnë ta shfrytëzojnë.