Kompania Acer do të jetë e para e cila do të ofrojë laptopin me sistemin operativ të Google Chrome OS. Sipas paralajmërimeve, kjo do të duhej të ndodhë dikur në pjesën e dytë të vitit të ardhshëm.
Acer ka qenë edhe kompania e parë e cila pat paraqitur netbookun e parë të bazuar në sistemin operativ Android prandaj edhe mund të pritet të ngutet me sistemin Chrome OS.

Detaje për laptopin e ri për momentin nuk ka, mirëpo kur merret parasysh se është folur që Chrome OS është i dedikuar për instalim në disqet SSD, e jo në ata të fortë, mund të pritet që netbooku me Chrome nga Acer do të ketë pikërisht disk SSD për ruajtjen e të dhënave.

Sa për rikujtim, Chrome OS është sistem operativ i kompanisë Google i cili (tani për tani) është i dedikuar për kompjuterët netbook, që përbëhet nga shfletuesi i internetit Chrome, në të cilin ekzekutohen aplikacionet e uebit. /