Toronto - Pronari i një dyqani të vogël me vend për pagesë të lotos në Toronto ka pranuar para gjykatës se ka përvetësuar preminë e tjetërkujt në shumë prej 5.7 milionë dollarëve kanadezë.
Hafiz Malik (62) i kishte thënë myshteriut, që kishte ardhur të verifikonte në makinën e lotarisë nëse kishte fituar diçka, se ajo tiketë nuk ka fituar asgjë, ndonëse e kishte vërejtur menjëherë se aji tiketë vlente miliona. Myshteriu nuk kishte dyshuar asgjë, ndërsa Malik ka pritur shtatë muaj dhe pastaj ka ngritur nga lotaria kanadeze shumën prej 57 milionë dollarëve. Pak kohë pas kësaj, në shkurt të vitit 2005, ai ka mbyllur dyqanin ku kishte punuar me vite të tëra, ka blerë një shtëpi të vlefshme një milion dollarë, një veturë luksoze, etj.
Mirëpo, katër gra, të cilat me vite të tëra kishin lozur të njëjtit numra në loto, pikërisht ata numra të cilët i kanë sjellë miliona fituesit të rrejshëm, kanë dyshuar se diçka nuk është në rregull. Mashtruesi është arrestuar para dy vjetësh, i është konfiskuar shtëpia dhe të gjitha patundshmëritë, si dhe i është bllokuar llogaria në bankë.
Mediet kanadeze tashti informojnë se lotaria shtetërore ua ka paguar preminë katër fitueseve të vërteta, secilës nga 1.6 milion dollarë, përfshirë edhe nga 200 mijë dollarë kamatë.
Hafiz Malik, i cili ka shtetësi të dyfishtë, kanadeze e pakistaneze, do të mbrohet në liri, kurse vendimi i gjykatës pritet në pranverë të vitit 2010. 
Rasti i tij nuk është i vetmi i këtij lloji në Kanada. Sipas informatave në dispozicion, gjatë 13 vjetëve të kaluar, afro 200 milionë dollarë i kanë marrë pronarët e dyqaneve që shesin tiketa të llogarisë, apo anëtarë e familjeve të tyre. Natyrisht që në mesin e tyre ka edhe fitues të vërtetë, por lotaria e shtetit Ontario të Kanadasë si masë parandaluese ua ka ndaluar shitësve që të blejnë tiketa të kësaj lotarie. Është futur edhe obligimi i çdo lojtari që të nënshkruhet në tiketën e paguar.