Tokio – Pronarët e hoteleve japoneze të cilat gjenden në afërsi të stacioneve të trenit, kanë vendosur të tërheqin adhuruesit e trenave, duke u ofruar akomodim në dhomat me shikim nga hekurudha, transmeton BBC.
Shumica e njerëzve zgjedhin dhoma të cilat ndodhet sa më larg hekurudhës së trenit, pasi që nuk mund të pushojnë nga zhurma që krijojnë trenat.
Por menaxherët e disa hoteleve, të cilat gjenden në afërsi të stacionit në Tokio, kanë vendosur që dobësinë e mundshme ta shndërrojnë në mundësi të biznesit, pasi që duke përdorë hekurudhën mund të tërheqin mysafirë të rinj.
Ato dhoma që turistët dhe njerëzit që kanë nevojë për pushim kryesisht nuk dëshirojnë t’i përdorin, hotelet i reklamojnë duke theksuar se kanë shikim të shkëlqyeshëm nga hekurudha, dhe kështu tërheqin adhurues të trenave e hekurudhave.
Është vlerësuar se në Japoni ka rreth 20.000 njerëz të cilët merren me shikimin dhe fotografimin e lokomotivave, trenave dhe hekurudhave, si dhe studimin e karakteristikave të tyre.
Për këtë hobi të tyre të gjithë së bashku shpenzojnë më shumë se 40 milionë dollarë në vit, dhe për këtë hotelet kanë parë mundësinë për biznesin e tyre.
Hoteli “Mets Akabane” në Tokio ka plan që të gjitha dhomat e tij që gjenden në katin e katërt, e më sipër dhe që japin shikim të shkëlqyer në hekurudhë t’i ofrojë për këtë qëllim. Menaxheri i hotelit deklaroi se mysafirët janë shumë të kënaqur me strehimin dhe kthehen përsëri. Hotelet tjera mburren me shikimet në disa prej stacioneve të trenave më të dendur, dhe gjithashtu ofrojnë edhe dhurata e suvenire për adhuruesit e trenave.