Prishtinë- Vëllezërit Taulant e Granit Xhaka në fillim të vitit të ardhshëm do të avancohen në ekipin e parë të klubit të njohur zviceran të futbollit, Bazel. Mesfushorët Xhaka janë pjesë e ekipit U-21 të Bazelit. Dy muaj më parë ata firmosën kontratat e tyre të para profesioniste që i lidhin me Bazelin deri në qershor të vitit 2011.
"Jemi marrë vesh me drejtuesit e klubit që nga fillimi i janarit të kalojmë në ekipin e parë. Deri tani kemi qenë pjesë e ekipit U-21, ndërsa me ekipin e parë kemi stërvitur vetëm një herë në javë. Ndërsa nga fillimi i vitit do të jemi anëtarë të rregullt të ekipit të parë", ka thënë të enjten për gazetën 17-vjeçari Granit Xhaka. Ai më 15 nëntor fitoi titullin e kampionit të botës me Zvicrën U-17, në kampionatin që u mbajt në Nigeri. Taulanti është një vit e gjysmë më i madh se Graniti, ndërsa luan për U-19 të Zvicrës. Graniti luan mesfushor i krahut, ndërsa Taulanti mesfushor defensiv. Kanë lindur në Zvicër, në një familje me prejardhje nga Prishtina.
"Ne jemi duke luajtur shumë mirë në ekipin e të rinjve dhe njëjtë presim të vazhdojmë edhe në ekipin senior. Drejtuesit e klubit llogarisin shumë në ne. Me fillimin e pjesës pranverore pres që të debutojmë në Superligë. Jemi të gatshëm për këtë", ka shtuar Granit Xhaka.
Ai ishte njëri ndër lojtarët më të mirë të Zvicrës në Botërorin e mbajtur në Nigeri. Për shërbimet e tij u interesuan klubet më të mëdha nga Anglia, Italia e Gjermania.
"Oferta ka, por nuk planifikoj të lëviz nga Bazeli. Dua që hapin e parë në karrierë si senior ta bëjë në Zvicër, e pas tri apo katër vitesh të kaloi në ndonjë ligë më të fortë", ka shtuar Granit Xhaka.
Vëllezërit Xhaka pjesë e klubit Bazel janë nga viti 2003. Kanë kaluar të gjitha kategoritë në këtë klub. Pas javës së 18-të Bazeli renditet i dyti me 34 pikë. Pjesë e ekipit të parë të Bazelit janë dy futbollistë kosovarë, mbrojtësi Beg Ferati dhe mesfushori Xherdan Shaqiri. 23-vjeçari Ferati këtë edicion ka luajtur shtatë herë, ndërsa 18-vjeçari Shaqiri ka një gol në 15 paraqitje. Me 12 tituj të kampionit, Bazeli është njëri prej klubeve më të suksesshme zvicerane.
