Ylli portugez i Real Madridit, Cristiano Ronaldo është futbollisti më i shpejtë aktualisht në botë. Kështu është konstatuar në një hulumtim të bërë nga gazeta gjermane "Der Spiegel".
Ronaldo shpejtësinë më të madhe në një sprint të plotë e arrin 33.6 kilometra në orë. Pak më i ngadalshëm se ai është ylli holandez i Bayern Munchenit, Arjen Robben, i cili arrin shpejtësi 32.9 kilometra në orë.
Supertalenti i Arsenalit, Theo Walcott zë pozitën e tretë, ndërsa ylli i Manchester Unitedit, Wayne Rooney pozitën e katërt në këtë hulumtim.
Ronaldo vlerësohet njëri prej futbollistëve më të mirë në botë. Ai, edhe pse është i njohur për shpejtësi, gjysmë viti më parë kishte marrë disa leksione nga rekordmeni i botës në 100 dhe 200 metra sprint xhamajkani Usain Bolt. Ky e kishte stërvitur portugezin që të bëhej edhe më i shpejtë. Ronaldo këtë verë ka kaluar nga Unitedi në Real Madrid për shumë rekorde prej 94 milionë euro.
Me gjithë problemet me lëndime, portugezi ka shfaqur formë të lartë në të gjitha frontet me skuadrën madrilene.
Njeriu më i shpejtë në botë, Usain Bolt, shpejtësinë maksimale e ka 44.7 kilometra në orë dhe këtë e arriti kur e theu rekordin e botës në 100 metra në Botërorin e mbajtur në Berlin këtë vit (9.58 sekonda).