[You must be registered and logged in to see this image.]

Leje ndërkombëtare, për udhëtim në Evropë

Gjatë udhëtimit në shtetet e jashtme me automjet, drejtuesit e makinave nga Maqedonia duhet të posedojnë edhe leje vozitëse ndërkombëtare. Ndërkohë ky dokument vërteton lejen vozitëse në disa gjuhë botërore.
Sipas Ministrisë së Punëve të Brendshme (MPB), lejet e reja biometrike për vozitje janë nacionale dhe vlejnë vetëm për shtetin maqedonas. “Ne si MPB japim vetëm leje vozitëse nacionale, ku të gjithë e dimë se merren pas aprovimit të provimit të patentë shoferit. Sa i përket udhëtimeve ndërkombëtare, atëherë duhet të posedojnë edhe leje shtesë për vozitje ndërkombëtare, për të cilat nuk jemi ne përgjegjës apo kompetent për këtë”, tha Borçe Peshevski, zëdhënës në MPB.

Ai gjithashtu shtoi se kjo kërkohet pasi që disa shtete nuk e pranojnë lejen vozitëse nacionale, sepse në të nuk figurojnë disa gjuhë të huaja. Sipas tij Auto Moto Lidhja e Maqedonisë (AMLA) është kompetente për furnizimin e shoferëve me këtë dokument shtesë.

“Dokumentet të cilat nevojiten për marrjen e kësaj leje vozitëse janë dy fotografi, letër njoftoi apo pasaporta si dhe leja vozitëse nacionale”, njoftojnë nga AMLA.

Gjithashtu, thanë se ky lloj dokumenti shtesë ka afat kohor tre vite deri në skadim, por nëse ndodh që t’i kalojë afati lejes nacionale, atëherë ky më nuk vlen dhe duhet aplikuar për të marrë leje të re.

Ky dokumentacion shtesë, i cili është i nevojshëm për udhëtim me automjet jashtë kufijve të Maqedonisë kushton 845 denarë. /Lajmpress/