Britania e Madhe, edhe pas ndërrimit të banorit të saj të parë në Downing Street, Nr.10, ka ritheksuar qëndrimin e përkushtuar për pavarësinë e Kosovës dhe ndihmën e pandryshuar për integrim në familjen ndërkombëtare.
“Mbështetja e pavarësisë, sovranitetit dhe të integritetit territorial të Kosovës nga ana e Mbretërisë së Bashkuar është e patundur,” tha në fjalën e tij në mbledhjen e fundit të Këshillit të Sigurimit, ambasadori britanik, Ser Mark Lyall Grant. Ai ka theksuar
progresin në Kosovë gjatë muajve të fundit që reflektohet në mbajtjen e suksesshme të zgjedhjeve lokale, që tha se ‘demonstron përkushtimin e vërtet të qeverisë së Kosovës që të përmirësojë përditshmërinë e bashkësive pakicë.’ Më tej Ser Lyall Grant theksoi se ishte tepër e rëndësishme për Kosovën që të ndërmerrte hapa të përmirësojë standardet në qeverisje dhe sundimin e ligjit. Kjo është esenciale për Kosovën në mënyrë që të zë hapin e progresit me vendet fqinje drejt integrimit evropian. Edhe qeveria e re konservatore britanike inkurajon bashkëpunimin midis Prishtinës dhe Beogradit për çështje praktike dhe ka mbështetur thirrjen e Sekretarit të Përgjithshëm për “fleksibilitet dhe pragmatizëm në gjetjen e zgjidhjeve”. Pasi ka theksuar mbështetjen e punës së EULEX-it dhe të misionit të BE-së mbi sundimin e Ligjit në Kosovë, ambasadori britanik nënvizoi se “Kosova tanimë e ka vërtetuar qëndrueshmërinë e vetë si një shtet i pavarur e mbështetur nga BE-së me perspektivë evropiane.”