Tre shtetasit e Maqedonisë dhe shtetasi i Kosovës, pjesë e karvanit të anijeve humanitare pritet sot të deportohen nga autoritetet izraelite.
Lajmi bëhet i ditur për agjencinë e lajmeve INA nga Ministria e Jashtme e Maqedonisë. Tre shtetasit e Maqedonisë, Jasmin Rexhepi, Sali Emin dhe Sead Hasipi gjenden në paraburgim në burgun Ashdon dhe pritet t’i dorëzohen diplomatëve të ambasadës së Maqedonisë, të cilët më pas do ti nisin drejt Stambollit dhe më pas në Shkup.

Ministria e Jashtme njoftoi se shtetasit e saj janë në gjendje të mirë shëndetësore dhe se po ndiqet situata rreth përfundimit të procedurave të deportimit të tyre në rrugë diplomatike.

Shtetasit e Maqedonisë ishin pjesë e karvanit humanitar të përbërë nga disa anije, të cilat ishin nisur për ti dërguar ndihma popullit palestinez në Gaza, mirëpo ato u ndaluan nga forcat speciale dhe detare izraelite, për shkak të shkeljes së hapësirës së ndaluar detare në këtë zonë të ujërave ndërkombëtare, 60 kilometra nga bregu afër Gazës.

Në incidentin e shkaktuar midis anëtarëve të grupit humanitar dhe ushtarëve izraelit janë vrarë rreth 9 aktivistë humanitarë.