Ambasadori i Britanisë së Madhe në Beograd, Stephen Wordsworth, ka deklaruar se askush në Bashkimin Evropian nuk i dëshiron bisedimet e reja për statusin e Kosovës – sepse, siç është shprehur ai – “shumë kohë do të humbej kot dhe do të vinte deri të destabilizimi i rajonit”.
“Nëse Serbia, apo ndonjë shtet tjetër, do të kërkonte të ktheheshim prapa, kjo nuk do të ndodhte, sepse askush në Kosovë nuk do të pajtohej me këtë dhe askush nuk do të përpiqej t’i bindte (në këtë gjë)”, ka thënë Wordsworth në një intervistë për të përditshmen “Danas”.

“Një veprim i tillë do të nënkuptonte konfrontim të Beogradit me 22 shtete anëtare të BE-së që e kanë njohur pavarësinë e Kosovës. Zyrtarëve serbë shumë njerëz u kanë thënë shumë herë se insistimi në bisedime të reja nuk do të ishte ide e mirë”, ka thënë Wordsworth, duke porositur se – “çështja e Kosovës dhe integrimi evropian i Serbisë më nuk janë dy rrugë të ndara”.

“Për BE-në, si tërësi, ekzistimi i Kosovës është realitet. Që të gjitha 27 shtetet e BE-së janë pajtuar se Kosova ka perspektivë evropiane dhe në Bruksel askush nuk mund të thotë se Kosova nesër do të zhduket... Askush s’mund të hyjë në një organizatë, dhe të jetë i konfrontuar me 80 përqind të anëtarëve të saj”, ka thënë Wordsworth.