NATO e vlerëson situatën në Kosovë stabile - andaj, konsideron se mund të lejohet vazhdimi i reduktimit të trupave të Aleancës në terren. Megjithatë, vendimi për të kaluar në fazën e dytë të zvogëlimit do bëhet në bazë të analizave ushtarake dhe politike...
Në takimin e ministrave të mbrojtjes të shteteve anëtare të NATO-s, të enjten u diskutua në mënyrë joformale numri i ushtarëve të KFOR-it në Kosovë. Sipas fjalëve të sekretarit të përgjithshëm të NATO-s, Anders Fogh Rasmussen, asnjë afat për zvogëlimin e trupave nuk është përcaktuar.

Por, aleatët konsiderojnë se trendi i përgjithshëm në Kosovë është i kënaqshëm. “Vendimi për të kaluar në fazën e dytë të zvogëlimit do bëhet në bazë të analizave ushtarake dhe politike. Por, ju siguroj se nuk do të marrim asnjë vendim, i cili mund të ndikonte negativisht në situatën në Kosovë”, u deklaroi gazetarëve, njeriu i parë i NATO-s.

Ndonëse situata në Kosovë është e mirë, sipas fjalëve të Rasmussen, prezenca e KFOR-it në vend, është edhe më tutje e nevojshme. Ai, gjithashtu, porositi se, pavarësisht faktit se mision më i madh i NATO-s është në Afganistan, situata në Kosovë dhe tërë Ballkanin Perëndimor nuk është më pak e rëndësishme.

“NATO dhe KFOR-i mbesin plotësisht të përkushtuar ndaj paqes dhe stabilitetit në Kosovë dhe rajon”, u porosit nga selia e NATO-s. /RTK/Telegrafi/