Po shihet si i parealizueshëm
premtimi i kryeministrit Hashim Thaçi për themelimin edhe të pesë
universiteteve të reja publike.Jo veç
dinamika e ngadalshme e funksionalizimit të Universitetit të Prizrenit,
por edhe kapacitetet e limituara të kuadrove që ka Kosova, kanë krijuar
bindje të këtillë tek ekspertë të arsimit, shkruan sot në një tekst më
të gjatë analitik gazeta Koha Ditore. Dukagjin Pupovci beson se jashtë
Kosovës nuk ekziston një potencial i duhur i njerëzve të kualifikuar
që janë të gatshëm të kthehen dhe të ndihmojnë hapjen e universiteteve
të reja, ndërkaq Jonuz Salihaj e ka kualifikuar zotimin e kryeministrit
si premtim bosh, me qëllim përfitimi të poenëve politikë.
Pavarësisht
këtij skepticizmi, në Ministrinë e Arsimit kanë theksuar se po presin
vendimin e Qeverisë, në mënyrë që të nisin punët edhe për themelimin e
universiteteve të tjera.
Avdulla Alija, drejtor i Departamentit të
Arsimit të Lartë në Ministrinë e Arsimit, ka thënë se institucioni ka në
agjendë rritjen e përfshirjes së të rinjve në arsim të lartë, e
paralelisht kësaj edhe ofrimin e hapësirës fizike për studim.
“Deri
në vitin 2015 planifikohet që të rritet pjesëmarrja deri në 35 për qind
e të rinjve deri në moshën 25-vjeçare, duke rritur kapacitetet
ekzistuese dhe duke themeluar institucione të reja”, ka thënë Alija.
“Sa u përket universiteteve të reja, Ministria do të fillojë
aktivitetet sapo të merret vendimi i Qeverisë, i cili duhet të
parashohë kohën e fillimit të punës së cilitdo universitet të ri,
sikurse në rastin e Universitetit të Prizrenit”, ka shtuar ai.
Për
Universitetin e Prizrenit qeveria pati vendosur ta themelojë në prag të
fushatës elektorale. Ani se vendimi ishte marrë në tetor të 2009-s,
është dhënë zotimi se në tetor të 2010-s do të rekrutohen rreth 3 mijë
studentët e parë.
Mirëpo, akoma nuk janë zgjedhur organet drejtuese
të këtij institucioni të arsimit të lartë publik, nuk është zgjedhur
kuadri akademik, si dhe nuk janë miratuar kurrikulat për programet
mësimore.