Është plagosur sot në Mitrovicë, deputeti i Parlamentit të Kosovës, Petar Miletiq, derisa po dilte nga shtëpia e vet. Njoftohet se ngjarja ndodhi rreth orës tetë të mëngjesit, në pjesën veriore të qytetit. ...


Deputeti Miletiq, nënkryetar i Partisë Liberale Serbe, i cili banon në Mitrovicë, është qëlluar me armë zjarri nga persona tash për tash ende të paidentifikuar, dhe ka marrë plagë në këmbë. Këtë e konfirmoi, zëdhënësi rajonal i Policisë së Kosovës, Besim Hoti.

Incidenti ndodh vetëm pak ditë nga incidenti i së premtes në Mitrovicë, ku një qytetar humbi jetën dhe dhjetë të tjerë u plagosën si pasojë e një shpërthimi, gjatë një proteste të serbëve kundër hapjes së zyrës për regjistrim civil të qeverisë së Kosovës.

Ndërkoh Kryeministri Hashim Thaçi, ka kërkuar nga autoritetet në Serbi që të distancohen nga veprimet e dhunshme dhe nga sulmuesit ndaj deputetëve të Kosovës. Ai edhe një herë arsyetoi para legjislativit vendimin e Qeverisë së Kosovës për hapjen e Zyrës Civile në Veri të Mitrovicë, si kushtetues dhe të domosdoshëm.

Ndërsa kryekuvendari Jakup Krasniqi ka kërkuar angazhim të mekanizmave përkatës për mbrojtjen e kushtetutshmërisë.

Zbardhjen e rastit dhe vendosjen e kushtetutshmërisë në atë pjesë e kanë kërkuar edhe shefat e grupeve parlamentare.