Nëse do e pyesni një francez për modën e kosovarëve, atëherë ai do ju thotë se ajo është një modë mikse e marrë nga vendet e ndryshme perëndimore. Por, a kanë stil kosovarët dhe çka është në trend gjatë këtij viti? Për këtë flet njëra prej kreatoreve më të njohura të modës në Kosovë, Xheraldina Rexhepi, e cila thotë se sivjet në trend janë teshat më ngjyra dhe siluetat...
Rozë: Sa flasin rrobat për karakterin e njeriut?
Nuk jam e bindur se rrobat flasin për karakter. Ato janë shumë më shpesh shprehje e asaj se si ndiheni për momentin se sa diçka që reflekton karakterin si virtyt thelbësor që është. Vetëm stili mund të jetë pasqyrim real i karakterit.
Rozë: Sa duhet të përcillet trendi?
Moda dhe trendët janë kalimtare. Ajo që mbetet është stili. Të kesh stil do të thotë të jesh vetvetja. Gjëja e parë që duhet të mbani ndërmend dhe ta respektoni është të jeni vetvetja. Vetëm si të këtillë mund të jeni të bukur. Secila nga ju ka një pjesë të bukur të karakterit si dhe të paraqitjes fizike. Dhe nëse kreacioni të cilin do të zgjidhni ia arrin që këtë ta sjellë në pah, ta ritheksojë, tek atëherë paraqitja juaj do të jetë e suksesshme.
Rozë:Sa kemi modele të mira kur stili është në pyetje - mendoj për të gjithë ata që janë pjesë e ekranit tonë?
Mendoj se numri i njerëzve publikë, të cilët kanë stil është i limituar. Në fakt, ata edhe nuk duhet detyrimisht të kenë stil, por nga fitimet e tyre duhet të paguajnë profesionistin të përkujdeset për dukjen e tyre.
Rozë: Cili është trendi për verën 2010?
Trendi i sezonit për verën 2010 është një paletë e gjerë ngjyrash dhe siluetash. Ky trend vazhdon të jetë i koncentruar te fustanet dhe aksesoret përcjellës shumë feminin.
Ato kanë ngjyra kryesisht pastele ose kombinime monokromie, ku kontrasti më i mirë është ai në mes të bardhës dhe të zezës. Ngjyrat dhe dezenët kanë femininitet të shprehur, forma të bollshme florale, dantelle si dhe lule tredimensionale.
Rozë: Si duket silueta e një femre në baze të këtij trendi?
Theksi i posaçëm në këtë sezon, sa i përket siluetës, është vendosur te kraharori. Moda për verën 2010 fokusohet në krahët e gjerë, për të cilat përdoren jastëkët e posaçëm dhe mëngët voluminoze. Ato janë interesante, të fryra, me rrudhje ose me pala në formë ujëvare. Me rrudhje dhe pala të ngjashme i jepet edhe theksi i posaçëm belit, duke i sjellë në shprehje format femërore të trupit. Për këtë arsye shumë disenjatorë nuk hezitojnë as të përdorin rripa dhe shalle dekorative në bel. Kështu sivjet në trend janë pjesët e poshtme të fustanit me forma kambane, baloni apo tulipani. Palët, palosjet, rrudhat apo drapet që këtë sezon janë shumë moderne, përdoren në të shumtën e rasteve për të tërhequr vëmendjen nga këmbët. Të punuara profesionalisht dhe me përpikëri ato e theksojnë gjoksin dhe belin. Shpeshherë përdoren për të mbuluar defektet në zonën e barkut si dhe për të ritheksuar format femërore të figurës.
Rozë: Cili është hiti i kësaj vere?
Hiti i verës 2010 janë edhe pantallonat e nxehta shumë, shumë të shkurta, si dhe çorapet me gjatësi mbi gjunjë.
Rozë: Cilat ngjyra janë në modë?
Paleta e ngjyrave për 2010-ën është e gjerë. Ajo përbëhet kryesisht prej ngjyrave shumë të hapura, pasteleve sherbete, nuancave natyrale dhe të mos harrojmë se materialet njëngjyrëshe kanë numër më të madh të përkrahësve, kënaqin çdo shije dhe janë më të lehta për përshtatje me aksesorë. Ngjyrat në modë janë: tirkiz, ngjyra e puresë se domateve, ngjyra e koraleve, ngjyrë qielli para lindjes së diellit, nuancat vjollce, ngjyra e shampanjës së kuqërremtë, nuancat e ftohta të ngjyrës së katërt, nuancat e bimëve të thara dhe ngjyra e eukaliptusit. Por, assesi mos harroni se ngjyra me moderne është ajo që e bien në pah bukurinë tuaj dhe që përshtatet me ngjyrën e syve, flokëve dhe lëkurës tuaj.