Elbasan, 10 korrik - Lëkundje të forta nga tërmeti janë ndjerë pak pas mesnatës, të shtunë, në gjithë Shqipërinë e Mesme. Instituti Sizmiologjik ka regjistruar lëkundje të forta me magnitudë prej 4.6 shkallësh të Rihterit. Sipas sizmiologut Rrapo Ormëni, lëkundjet kanë zgjatur për 3-4 sekonda. Intensiteti i lëkundjeve ka qenë deri në 6 ballë dhe është ndjerë fuqishëm në Elbasan, në Tiranë dhe në Durrës, por edhe në disa qytete të tjera.
Lëkundjet kanë shkaktuar panik tek qytetarët e kryeqytetit, të cilët kanë dalë jashtë banesave të tyre. Sizmiologu Rrapo Ormëni, informoi gjatë orëve të natës se epiqendra e tërmetit ishte 15 kilometra në veriperëndim të Elbasanit, në fshatin Shëngjin, në të djathtë të rrugës Tiranë- Elbasan.
Shefi i emergjencave civile të Elbasanit, ka deklaruar se kishte vënë kontakt me kryetarin e komunës dhe është njoftuar se nuk ka pasur dëme materiale në fshatin Shëngjin, ku ishte epiqendra e tërmetit. Edhe prefekti i Qarkut të Tiranës, Keltis Kruja, ka konfirmuar se nuk ka të lënduar dhe dëme materiale.