Drejtuesit e Çelsit e kanë ndryshuar ofertën që do t’ia paraqesin Liverpulit për sulmuesin spanjoll Fernando Torres, për shkak të problemeve me lëndime. ...
Sipas portalit “Goal.com” Çelsi do të paguante për Torresin 50 milionë funte, por shkak të problemeve me të cilat po ballafaqohet 26-vjeçari drejtuesit e klubit londinez tashmë janë të gatshëm të paguajnë vetëm 30 milionë funte. Pjesa tjetër e shifrës (20 milionë funte) do të varej nga paraqitjet e Torresit për klubin londinez. Drejtuesit e Çelsit kishin filluar bisedimet me homologët e tyre nga Liverpuli para finales së Botërorit, ndërmjet Spanjës dhe Holandës, në të cilën ndeshje Torresi u lëndua. Pas kontrollimeve mjekësore është konfirmuar se Torresi ka tërhequr muskulin e kofshës së majtë dhe për këtë arsye do të jetë i detyruar të pushojë tri javë, gjatë të cilës periudhë do t’i nënshtrohet një programi të veçantë të rehabilitimit, në mënyrë që ta pres i gatshëm fillimin e edicionit. Torresi ka pasur probleme të shumta me lëndime dhe është operuar tri herë, por Çelsi nuk heq dorë nga transferimi i tij dhe drejtuesit e këtij klubi janë shprehur optimist se pas kthimit të sulmuesit spanjoll nga pushimet do të arrijnë marrëveshje. Ndërkohë mediat angleze bëjnë të ditur se trajneri i ri i Liverpulit, Roi Hoxhson ka ndërmend ta vizitojë Torresin në Spanjë, në mënyrë që ta bind për të mbetur në “Anfield”.
