Legjenda e Mançester Junajtedit, Pol Skols, i cili ishte njëri nga lojtarët më të dalluar në fushë në ndeshjen e Superkupës së Anglisë ndaj Çelsit (3:1), ka lavdëruar futbollistin e ri meksikan, Havier Hernandez, duke e vlerësuar si një pasardhës ideal i Ole Gunar Solskjerit te “Djajtë e Kuq”.... Sulmuesi meksikan u transferua në fillim të kësaj vere nga Guadelajara për 5 milionë funte dhe përveç Botërorit në Afrikën e Jugut me kombëtaren e tij, ai ka lënë një përshtypje të mirë tashmë edhe në fanellën e Mançester Junajtedit. Ai shënoi golin e dytë në fitoren e “Djajve të Kuq” të dielën në “Wembley”, duke fituar menjëherë simpatinë e tifozëve të skuadrës, por edhe të bashkëlojtarëve. Skols e sheh Hernandezin si një lojtar të ngjashëm me Solskjerin, i cili në 366 ndeshje me “Djajtë e Kuq” pati shënuar 126 gola. “Njerëzit thonë se ai është si Ole Gunar Solskjer, kurse unë kam menduar ashtu që kur e pash në stërvitjen e parë. Ai është i aftë për të shënuar sa herë që i jepet rasti. Ai duket një golgeter i lindur. Kjo nuk do të thotë se ai nuk mund të luajë mirë edhe jashtë 16-metërshit, sepse kur topi i vjen në këmbë ai bënë lëvizje shumë të mira. Sidoqoftë ai është një kërcënim i madh për mbrojtësit kundërshtar dhe ne shpresojmë se ai do të realizojë shumë gola në këtë edicion. Ai tashmë është përshtatur shumë mirë në ritmin e lojës tonë”, ka thënë Skols.
