Kombëtarja e Shqipërisë ka arritur të barazojë 1:1 në ndeshjen e parë të fushatës kualifikuese për Euro 2012 në duel me Rumaninë në qytetin Pietrea Neamt
Rumunët e nisën rrufeshëm ndeshjen dhe që në minutën e parë kërcënuan seriozisht. Rat harkoi në zonë, Beqaj nuk arriti ta zotërojë topin, kurse gjuajtjen e Marikës e ndali shtylla pingule. Në minutën e 23-të Daek ka depërtuar në zonë dhe ka goditur furishëm, por gardiani shqiptar ka reaguar shkëlqyeshëm duke e çuar topin në fundore. Një tjetër intervenim të mirë portieri kosovar e ka pasur edhe në minutën e 27-të, kur Nikolaei u përpoq ta befasojë nga distanca, por ai reagoi si duhet. Edhe në pjesën e dytë kuqezinjtë kanë qenë shpesh nën ethe. Madje në minutën e 65-të ka qenë Ansi Agolli që ia ka ndërprerë rrugën topit që po shkonte drejt rrjetës së kuqezinjve pas goditjes së Koçishit, pasi më herët Vangjeli gaboi brenda zonës. Ndërkohë një mundësi të mirë shënimi kuqezinjtë e patën në minutën e 73-të, kur Agolli nga krahu i majtë e shërbeu në afërsi të shtyllës së parë Salihin, por ky nuk arriti ta çojë topin në rrjetë. Vendasit kaluan në epërsi në minutën e 80-të. Daek nga goditja e këndit dërgoi një harkim në zonë, ku Mureshan devijoi topin me kokë deri te Bogdan Stanku, i cili shfrytëzoi pakujdesinë e mbrojtjes shqiptare dhe me majën e këmbës arriti ta çojë topin në rrjetën e portës së Beqajt, 1:0, duke krijuar gëzim të madh në tribunat e stadiumit. Megjithatë, këtë festë të rumunëve e prishi pas vetëm shtatë minutash Gjergji Muzaka, me golin e shënuar me kokë pas harkimit të Ansi Agollit. Në sekondat e fundit të ndeshjes Shqipëria pati një mundësi tjetër shënimi, por gjuajtjen e Hamdi Salihit arriti ta pret Lobont. Ndeshjen e radhës Shqipëria e zhvillon kundër Luksemburgut, më 7 shtator në stadiumin kombëtare “Qemal Stafa” në Tiranë.
