“Kurani”, Pastori nuk heq dorë nga djegia
Në mëngjes hoqi dorë nga plani i tij kundërshtues, por më vonë iu rikthye idesë së tij të vjetër. Prifti amerikan evangjelist Teri Xhons nga Florida, ka mundësi që nesër të djegë rreth 200 kopje të kuranit, pikërisht në përvjetorin e sulmeve të Al Kaidës në Nju Jork dhe Uashington.
Në fillim hoqi dorë nga qëllimi i tij për shkak se pas një takimi me liderin islamik në Florida, krijoi përshtypjen se qendra myslimane në afërsi të vendit ku dikur qëndronin kullat binjake në Nju Jork, nuk do të ndërtohej.
“Imami më tha se nuk mund ta heqin që nesër qendrën, por më garantoi se xhamia do të hiqet nga lokacioni i tanishëm. E pyeta tre herë dhe kam dëshmitarë se ai ma premtoi atë. Nëse nuk e heq, atëherë mendoj se islami është shembull i keq si religjion. Mendoj se do të kishte qenë shumë keq nëse gënjen një i ashtuquajtur njeri që i shërben Zotit. Pa dyshim nuk e pres atë. Shpresoj se do ta mbajë fjalën”, tha Teri Xhons, pastor evangjelist
Por vetëm disa orë më vonë, imami Muhamed Musri mohoi se ka rënë dakord për një gjë të tillë. Sipas tij, bëhej fjalë vetëm për këtë.
“Ajo që u ofrua nga Nju Jorku është angazhimi për takim mes meje dhe priftit Xhons në lidhje me xhaminë në Graund zero, respektivisht për qendrën që planifikohet të ndërtohet atje. Atë që i thash Priftit Xhons është se imami dhe njerëzit e tij janë të gatshëm për takim në të cilin do të shqyrtohej kërkesa e tij për zhvendosjen e xhamisë”, u shpreh Muhamed Musri, imam nga Florida.
Tani mbetet vetëm të presim çfarë do të ndodhë gjatë orëve që vijnë. Lajmet për djegien e Kuranit ditëve të fundit pushtuan mediat botërore për shkak të tensioneve që një akt i tillë mund të shkaktojë në vendet ku jetojnë myslimanët. Shumë përfaqësues qeveritarë në botë, shumë vende islamike, por edhe presidenti amerikan Barak Obama i bëri thirrje Xhonsit të heq dorë nga ky mendim i rrezikshëm.
