Sekretari i Përgjithshëm i NATO-s, Anders Fogh Rasmussen, ka thënë se incidentet e fundit në veri të Kosovës, nuk e prishin situatën e përgjithshme të sigurisë në Kosovë. Kjo bën që aleatët të jenë ende të interesuar për reduktim shtesë të pranisë ushtarake ndërkombëtare, ka thënë Rasmussen.
Rasmussen është shprehur se asnjë vendim nuk është marrë ende për shkurtime të reja. Shefi i NATO-s tha se para çdo vendimi për reduktim të mëtejmë të trupave të NATO-s në Kosovë, NATO-ja do t`i presë analizat e autoriteteve ushtarake, raporton RTK.

Ndërkaq, lidhur me një çështje tjetër që është duke u përfolur në qarqet diplomatike rreth kërkesës së Serbisë për të bërë ndryshime në marrëveshjen tekniko-ushtarake që NATO-ja kishte arritur me Beogradin në fund të vitit 1999, Rasmussen tha se NATO-ja është duke e shqyrtuar këtë kërkesë, porse asnjë vendim rreth kësaj nuk është marrë.

Shefi i NATO-s, megjithatë përshëndeti atë që e quajti sjellje shumë konstruktive të Serbisë rreth rezolutës për Kosovën në Asamblenë e Përgjithshme të Kombeve të Bashkuara.