New York, Prishtinë, 22 shtator - Sekretari i përgjithshëm i OKB-së, Ban Ki-moon e ka theksuar rëndësinë e dialogut të Serbisë dhe Kosovës mbi shpalljen e pavarësisë së Kosovës, njoftuan Kombet e Bashkuara.

Gatishmërinë e Kombeve të Bashkuara për të kontribuar në këtë drejtim, Ban Ki-moon e ka paraqitur në takimet me tri udhëheqësit në margjinat e samitit mbi synimet e Mileniumit në New York, shkruan në komunikatën me titull “Serbia dhe Kosova duhet të përfshihen në dialog për kontestin”.

Ban Ki-moon ka biseduar për Kosovën me presidentin serb Boris Tadiq, i cili ka thënë se dialogu mes Prishtinës dhe Beogradit duhet të prekë të gjitha çështjet e hapura.

“Kemi rënë dakord se do të ketë dialog të hapur. Paqja është ajo që mbi të gjitha duam ta arrijmë, si për Kosovën ashtu edhe për të tjera vende në rajon. Konflikti shumëvjeçar ndërmjet popullit serb dhe atij shqiptar duhet të zgjidhet me kompromis, që të gjithë të kemi të ardhme evropiane dhe t’u ofrojmë qytetarëve tanë perspektivë më të mirë”, ka thënë Tadiq, pas bisedës me kreun e OKB-së.

Ndërsa nuk është bërë e ditur formati i bisedimeve, kryetari i Kuvendit te Kosovës, Jakup Krasniqi ka deklaruar se bisedimet nuk do të prekin statusin, por ka shtuar se çdo marrëveshje politike me Serbinë duhet të kalojë përmes Kuvendit.

Kryeministri i Kosovës, Hashim Thaçi mbrëmë, në një intervistë për RTK-në nga New Yorku ka thënë se nuk bëhet fjalë për bisedime që prekin çështjen e statusit dhe se Kosova dhe Serbia do të bisedojnë si dy shtete të pavarura dhe sovrane.

“Do të bisedojmë për çështjen e kthimit të të zhvendosurve dhe fatin e njerëzve të zhdukur”, ka thënë Thaçi.

Mbrëmë në New York sekretarja amerikane e shtetit, Hillary Clinton dhe përfaqësuesja e lartë e BE-së për politikë të jashtme dhe siguri Chatherine Ashton janë takuar për të caktuar agjendën e bisedimeve të paralajmëruar midis Prishtinës dhe Beogradit.