Komuna e Deçanit ka qenë e njohur për numrin e madh të deponive të egra, por siç duket kjo çështje do të zgjidhet së shpejti.

Ditën e premte janë parë eskavatorë të kompanive të ndryshme të kësaj komune të cilët në mënyrë vullnetare kanë shprehur gatishmërinë për largimin e të gjitha mbeturinave nga Komuna, që njëherësh kanë qenë edhe shqetësim mjaft i madh i banorëve të kësaj ane.

Drejtori i Drejtorisë për Shërbime Publike Admir Hasanaj, tregon se kanë hasur në mirëkuptim që kompanitë private të ndihmojnë për largimin e mbeturinave dhe mbylljen e deponive të krijuara në pjesën më të madhe të hapësirave publike.

Edhe pronarët e kompanive të cilët kishin dalë në terren shprehen se kur është në të mirë të komunës edhe ne jemi në gatishmëri që të dalin në ndihmë çdo herë.

Ndërkaq, drejtori i Kompanisë "Higjiena", kompani komunale për pastrim, Sadik Ismajlaj thotë se problemi kryesor qëndron tek mos kujdesi i qytetarëve.

“Ndërkaq pas përfundimit të pastrimit në tërësi të këtyre deponive do të fillojmë me një aksion shumë të rreptë ku do të lusim edhe Drejtorinë e Inspeksionit të na dalë në
ndihmë, në mënyrë që ata të cilët do të ndotin ambientin të zihen dhe të ju shqiptohen gjobat e merituara në gjykatë”, tha Ismajlaj.

Ky aksioni i cili ka filluar në regjionin e Vokshit, në Lëbush, Strellc, Isniq, Prapaqan, Kodrali, Llukë e Ulët dhe shumë vende tjera në Komunën e Deçanit do të vazhdojë derisa në tërë komunën do të mbyllen të gjitha deponitë e egra që shkaktojnë rrezik mjaft të madh për njerëzit e sidomos për fëmijët.

Qytetarët shprehen të kënaqur me këtë aksion të përbashkët të komunës dhe kompanive private, duke shprehur dëshirën që tash e mbrapa mbeturinat të hedhen në vend të caktuar e mos të shëmtohet ambienti që na rrethon.