Institucionet e Kosovës janë duke punuar me intensitet të madh me të gjitha subjektet politike për të gjetur një zgjidhje të pranueshme për kapërcimin e situatës se krijuar pas dorëheqjes së presidentit Sejdiu, ka thënë ushtruesi i detyrës së presidentit të Kosovës, Jakup Krasniqi.

Ai këto komente i bëri të premten gjatë një takimi me ambasadorin e Republikës së Shqipërisë në vendin tonë, Islam Lauka, të cilin e falënderoi për vizitën dhe për përcjelljen e përshëndetjeve nga krerët më të lart të shtetit shqiptar.

Ambasadori Lauka pasi që e falënderoi Krasniqi për pritjen, i përcolli atij përshëndetjet më të mira nga presidenti i Shqipërisë, Bamir Topi, kryetarja e Parlamentit Jozefina Topalli, si dhe nga kryeministri Sali Berisha.

Po ashtu, ambasadori Lauka e vlerësoi lart punën që po bëhet për kapërcimin e situatës së krijuar dhe theksoi t’i vinte jashtëzakonisht mirë që në këto rrethana në krye të shtetit të Kosovës qëndron një personalitet i shquar.