Ushtruesi i detyrës së presidentit të Kosovës, Jakup Krasniqi ka dekoruar të premten admiralin Mark Fitzgerald me Medaljen Ushtarake, për kontributin e dhënë për ruajtjen e sigurisë, paqes dhe stabilitetit në Kosovë.

Dekorimi u bë në bazë të Kushtetutës së Republikës së Kosovës, neni 84, pika 28 si dhe në bazë të Rregullores mbi Dekoratat dhe Titujt e Nderit të Kosovës që i jep Presidenti i Kosovës dhe të Procedurave të Dhënies së Tyre, neni 3, 17 dhe 34.




Në këtë takim lamtumirës, ku mori pjesë edhe kryeministri i Kosovës Hashim Thaçi, u.d. i presidentit të Kosovës, Jakup Krasniqi, e informoi admiralin Fitzgerald me zhvillimet e fundit politike nëpër të cilat po kalon vendi dhe tha se në Kosovë nuk ka krizë politike e as vakum institucional dhe se po punohet me një ritëm të përshpejtuar që sa më shpejt të kapërcehet situata e krijuar pas dorëheqjes së presidentit Fatmir Sejdiu.

Ai e falënderoi admiralin Fitzgerald për mbështetjen që NATO, Shtetet e Bashkuara dhe ai personalisht i kanë dhënë dhe janë duke dhënë për sigurinë dhe proceset e përgjithshme në vendin tonë.

Lidhur me situatën e përgjithshme në veri të vendit, ishte konstatim i përbashkët se duhet të vihet rendi dhe ligji.

Ndërkaq, admirali Fitzgerald, mes të tjerash i vlerësoi lart arritjet që janë bërë në Kosovë në të gjitha fushat.