Drejtori i kompanisë së sigurimeve “Dardania” Mehmet Duçi është liruar, pas gati 24 orë qëndrimi në paraburgim, por do të vazhdojë të jetë nën hetime.

Lajmi është konfirmuar nga zëdhënësja e EULEX-it Kristina Herodes, sipas së cilës Duçi është marrë për disa orë në pyetje nga ana e hetuesve të EULEX-it.

Arrestimi i Duçit ka ardhur si vazhdimësi e procesit të hetimeve të filluara nga Prokuroria Speciale e Kosovës lidhur me krimet financiare.
Fokus i hetimeve janë paradhëniet që Duçi ka marrë në vazhdimësi si aksionari më i madh i kompanisë, shuma këto që nuk i ka kthyer.

Ai ka qenë aksionari kryesor i kompanisë “Dardania”.
Derisa ishte në prag të falimentimit, kjo kompani është shitur për 2.3 milionë euro, përderisa ai kishte deklaruar si dëme të papaguara rreth 1.9 milion dhe administrator nga Banka Qendrore ishte caktuar zyrtari Faton Bajrami.

Pas kësaj del se bëhet fjalë për një shumë më të madhe që kap shifrën rreth 4 milionë euro.

Duçi ka qenë një prej dëshmitarëve lidhur me rastin e guvernatorit të BQK-së Hashim Rexhepi, i cili po qëndron në paraburgim.