Ishte iniciativa e kryetarit të komunës, Avni Kastrati, për të na dhënë këtë zyrë, për çka e falënderojmë shumë, por kjo nuk është ndihma e vetme që ai ka bërë për neve, ka thënë Bajram Qerkini, kryetar i Shoqatës “Zëri i Prindërve” në Mitrovicë.

Ai këto komente i bëri të shtunën me rastin e inaugurimit të zyrës së re të Shoqatës së familjarëve të të pagjeturve “Zëri i Prindërve”.

Qerkini ka falënderuar të gjithë ata që kanë kontribuuar në çfarëdo forme në mbështetje të shoqatës dhe familjareve, për krijimin e kushteve për aktivitetet e tyre dhe zbardhjen e fatit të të pagjeturve.

“Shoqata ka punuar me kushte e pa kushte, me zyrë e pa zyrë, asnjëherë nuk e ka ndalur aktivitetin e saj, dhe tani është pjesë e 22 organizatave që merren me këtë çështje në nivel të Kosovës”, tha Qerkini, duke përmendur edhe katër makina për rrobaqepësi, të cilat kohë më parë kryetari Kastrati u ka dhuruar ndihmë Shoqatës, gjegjësisht grave kryefamiljare, të cilat me punën që bëjnë mbajnë familjet e tyre.

Kryetari Kastrati theksoi se Qerkini është si prind i të gjithë atyre fëmijëve që kanë prindërit e tyre të pagjetur, angazhohet për të gjithë, për krijimin e kushteve sa më të mira për ta. Ai ka premtuar mbështetje për këtë shoqatë edhe në të ardhmen.

Haki Kosumi, kryetar i Asociacionit të shoqatave të të zhdukurve në Kosovë, tha se “ne nuk kemi gëzime, neve na gëzojnë vetëm rastet e tilla si kjo e sotme, kur na krijohen kushtet për punë”.

Në anën tjetër, Sevdije Franku, që ka humbur vajzën gjatë luftës, falënderoi mediat që kanë kontribuar në sensibilizimin e kësaj çështje, por kritikoi televizionet nacionale, të cilat sipas saj nuk kanë bërë sa duhet.

Në këtë ceremoni, ishin të pranishëm, përfaqësues të pushtetit lokal, UNMIK-ut, KFOR-it, institucioneve të tjera, shoqatave të ndryshme joqeveritare, media etj.