Drejtues të Parisë Demokratike të Ashkalive të Kosovës (PDAK) kanë hedhur poshtë akuzat e drejtorit të OJQ-së “Shoqëria Demokratike”, Qazim Rrahmani të bëra një ditë më parë në adresë të deputetëve të këtij subjekti në nivel qendror dhe lokal, për neglizhencën e tyre në adresimin e çështjeve në institucione ku përkasin.

Sekretari për marrëdhënie me publikun, Asllan Kryeziu ka thënë se akuzat e Rrahmanit nuk qëndrojnë, për shkak se përfaqësuesit nga kjo parti janë aktivë si në Kuvendin e Kosovës, ashtu edhe në parlamentin lokal, dhe si rezultat i punës së tyre janë bërë ndryshime të shumta që kanë ndikuar si në punësimin e ashkalive ashtu edhe në përmirësimin e jetës së tyre.

Kryeziu ka nënvizuar se përjashtuar nga ky mes dy deputetët e Kuvendit të Kosovës, Hafize Hajdinin dhe Hetem Arifin, të cilët i janë bashkuar grupit të SLS-së në Kuvendin e Kosovës për interesa të tyre, deputeti tjetër Danush Ademi, njëherësh kryetar i PDAK-së ka qenë aktiv dhe ka rritur që të bëjë ndryshime të shumta.

“Falë kërkesave dhe punës këmbëngulëse të Danush Ademit, PDAK për herë të parë ka një zv/ministër, një asistent në Kuvendin e Kosovës, ka ndihmuar në regjistrimin e 10 studentëve, punësimin e 6 pjesëtarëve të komunitetit RAE në Doganat e Kosovës, ndërsa është në bisedime që ashkalinjtë të përfaqësohen në zyrë të Avokatit të Popullit dhe në KQZ”, ka thënë Kryeziu.

Duke folur për përfaqësuesit e kësaj partie në asamblenë komunale të Ferizajt, Kryeziu ka thënë se edhe dy deputetë në kuvendin e Ferizajt kanë qenë aktiv dhe kanë mbrojtur interesat e këtij komuniteti.

Ndryshe, dje drejtori i kësaj organizate publikisht i ka akuzuar përfaqësuesit e këtij komuniteti se nuk kanë shkuar në Kuvendin e Kosovës për t'i mbrojtur të drejtat e komunitetit ashkali dhe për të qenë njerëz të cilët lypin dhe mbrojnë interesat e komunitetit, por për t'u pasuruar dhe për t'i marrë pagat e tyre të deputeti./B.Idrizi