Sekretarja amerikane e Shtetit, Hillari Klinton sot e fillon turneun e saj në disa vende të Ballkanit, me ç’rast vendqëndrimin e parë do të ketë në Sarajevë, mandej në Beograd dhe në fund në Prishtinë.

Gjatë qëndrimit në Sarajevë, zonja Klinton pritet të takohet me liderët e Bosnjës, për të diskutuar situatën pas zgjedhjeve presidenciale dhe parlamentare.

Ndërkaq të martën pasdite, Hillari Klinton do të udhëtojë për në Beograd, ndërsa turneun nëpër vendet e Ballkanit do ta përmbyllë me vizitën në Prishtinë, më 14 tetor.

Çështja e Ballkanit do të jetë në rendin e ditës të të gjitha takimeve, ndërsa në Bosnjë, Serbi dhe Kosovë do të bisedojë me përfaqësuesit e shteteve, por edhe të sektorit joqeveritar dhe të shoqërisë civile.

Vizita e sekretares amerikane të Shtetit do të përcillet nga masa të rrepta sigurie nëpër të gjitha shtetet ku do të ndalet dhe qëndrojë nga një ditë.