Klinë, 12 tetor- Në Klinë 339 persona kanë aplikuar për heqjen e shtetësisë së Kosovës, bën të ditur Muhamet Gashi, shef i gjendjes civile në Klinë. Sipas tij rasti i parë është paraqitur më 20 maj të vitit 2009. Ndërsa vetëm sivjet janë 220 qytetarë, që punojnë në botën e jashtme, të cilët kanë aplikuar për të humbur shtetësinë e shtetit më të ri të Republikës së Kosovës. Prej, 339 personave, është vetëm një serb që ka kërkuar një gjë të tillë dhe ai është nga fshati Dresnikë i Klinës, të cilit i ka ardhur vendimi për humbjen e shtetësisë dhe ai do të behët shtetas i Malit të Zi, pasi që kërkesa ka ardhur nga autoritetet e këtij shteti. Gashi, tregon se pjesa dërmuese e qytetareve që kanë aplikuar të humbin shtetësinë e Kosovës, janë mërgimtarë, që punojnë në Gjermani, Austri, Danimarkë dhe shtetet e tjera perëndimore. Sipas tij
arsyeja kryesore është rregullimi i dokumentacionit personal në shtetin ku veprojnë dhe mundësia e lëvizjes me të lirë, sidomos nëpër Serbi, për të ardhur me lehtë në Kosovë.
Procedura për humbjen e shtetësisë zgjat afër 2 muaj. Autoritetet lokale druajnë se pas heqjes së vizave për Shqipërinë, do të ketë një invazion të qytetarëve për të lënë shtetësinë kosovare dhe për të marrë atë të Shqipërisë, për të lëvizur pa viza në vendet e ndryshme të botës.