Prishtinë, 13 tetor -Të rinjtë e Lëvizjes për Bashkim, së bashku me Tifozët Kuq e Zi dhe me ndihmën e lëvizjes “Vetëvendosje”, të revoltuar nga heqja e flamujve kombëtarë nga sheshet e Prishtinës, kanë marrë mbrëmë aksion për rivendosjen e tyre.
Në njoftimin për media të Lëvizjes për Bashkim bëhet e ditur se të martën, në orët e vona kanë rivendosur flamurin kombëtarë në sheshet e Prishtinës. Po të martën gjatë ditës është larguar flamuri kombëtarë, i cili ka qenë i vendosur së bashku me flamurin amerikan dhe atë të Kosovës, me rastin e vizitës së sekretares amerikane të Shtetit, Hillary Clinton.
Protokolli për vizitën e sekretares amerikane po bëhet nga Ambasada Amerikane dhe, sipas burimeve jozyrtare, është thënë se ambasada ka kërkuar që të hiqet flamuri kombëtar shqiptar, me arsyetimin se mbajtja e flamurit të një “shteti fqinj nuk është e preferueshme”.
Dëshmitarë okularë i kanë thënë Koha.net se mbrëmë pas vendosjes së flamujve, persona pa uniforma i kanë rihequr ato dhe kanë penguar rivendosjen e flamujve kombëtarë krahas atyre shtetërorë të SHBA e të Kosovës.
Zyrtarë të Kuvendit të Prishtinës mohojnë të kenë dhënë urdhër për heqjen e flamujve kombëtarë nëpër rrugët e kryeqytetit. Përkundrazi, Hortikulturës i është thënë që edhe ata të vendosen krahas të tjerëve, por se kush ka urdhëruar t’i heqin – thonë se nuk e dijnë.