Prishtinë, 16 tetor - Më 13 shkurt të vitit të ardhshëm mbahen zgjedhjet e parakohshme parlamentare, kurse më 21 nëntor të këtij viti zgjedhjet e jashtëzakonshme për kryetar të Rahovecit. Presidenti në detyrë, Jakup Krasniqi i ka bërë publike vendimet, duke u bazuar në kompetencat e tij kushtetuese.

Ndërkohë KQZ-ja ka thënë se do të mundohet që të gjitha aktivitete të kryhen në afat të caktuar kohor. Kryeshefi i sekretariatit të KQZ-së, Xhemaj Peqani ka thënë për KTV-në se koha e shkurtër do të jetë sfidë e madhe për KQZ-në. Organi me i lartë zgjedhor ka hartuar dy plane operacionale, një për zgjedhjet të jashtëzakonshme në Rahovec dhe tjetrin për zgjedhjet e parakohshme parlamentare.

“Sfidë për ne do të jetë koha, sepse është një kohë e shkurtër, po ashtu do të jetë edhe kohë dimri dhe faktikisht do të shkojmë paralel me dy palë zgjedhje, pra kjo do të jetë sfidë për ne, por shpresojmë se do t’i kryejmë sipas planit dhe dinamikës së paraparë” , ka thënë përmes telefonit Peqani. Sipas tij, derisa zgjedhjet në Rahovec zhvillohen në bazë të ligjin zgjedhor ekzistues, ato të 13 shkurtit varen nga vendimet e Grupit punues për ndryshimin e mundshëm të ligjit.