Prishtinë, 16 tetor - Në kohën që Lidhja Demokratike e Kosovës njoftoi se tërhiqej nga koalicioni qeverisës i vendit, kryeministri Hashim Thaçi, po takohej me biznesmenët e Ferizajt në një drekë pune. Ai, siç raporton KosovaLive, refuzoi t’u përgjigjet gazetarëve lidhur pasojat dhe kahet e zhvillimeve politike e shtetërore në vend, pas vendimit të LDK-së që të tërhiqet nga koalicioni qeverisës.
Kryeministri tha se po takohej me udhëheqësit e bizneseve, për të dëgjuar nga
afër idetë, sfidat dhe vizionet e tyre për zhvillimin e Kosovës, duke i konsideruar si promotorë të zhvillimit ekonomik.
Ai porositi bizneset e rajonit të Ferizajt që të përgatiten për të lidhur marrëdhënie partneriteti me kompanitë koncesioniste, pasi vitin e ardhshëm do të fillojë ndërtimi i autostradës Prishtinë-Shkup, si njëri nga projektet më të mëdha të vendit, që do t’u mundësojë angazhime edhe bizneseve vendore.
“E theksoj se fillimi i ndërtimit të autostradës Prishtinë Ferizaj Shkup, do të ndodh vitin e ardhshëm, në pjesën e parë të vitit të ardhshëm. Unë jam i obliguar të respektoj procedurat plotësisht dhe transparencën e plotë. Me fillimin e këtij projekti, për ju do të hapet një mundësi e re, e jashtëzakonshme për punësim, për krijimin e vendeve të reja të punës", u shpreh i pari i Qeverisë.
Thaçi vizitoi të shtunën Fabrikën e veglave dhe aparateve plus në Ferizaj, për t’u njohur me afarizmin e kësaj ndërmarrjeje të privatizuar, që ka arritur të punësojë rreth 50 veta. Kryeministri mohoi që vizita e tij afaristëve ferizajas të ketë karakter fushate. Ai tha se po përpiqet t’u japë zemër bizneseve për zhvillim të mëtejshëm si kryeministër i të gjithë qytetarëve të Kosovës.
Thaçi vizitoi edhe shoqatat ferizajase të dala nga lufta. Ai u tha veteranëve të luftës dhe familjarëve të dëshmorëve se është meritë e luftës së gjithë popullit të Kosovës, që sot kemi mundësi të flasim për çështjet e zhvillimit dhe integrimit të Kosovës në strukturat euroatlantike.
Kryeministri Thaçi refuzoi t’u përgjigjet gazetarëve lidhur pasojat dhe kahet e zhvillimeve politike e shtetërore në vend, pas vendimit të Lidhjes Demokratike të Kosovës që të tërhiqet nga koalicioni qeverisës.