Prishtinë, 19 tetor - Dy partitë më të mëdha në vend pritet të vendosin sot për hapat e mëtutjeshëm, pas shpërbërjes së koalicionit qeverisës PDK-LDK, raportojnë mediat në kryeqytet.
Në selinë e Lidhjes Demokratike tashmë është duke u mbajtur një takim, ku zyrtarët e kësaj partie po diskutojnë për hapat që duhet ndërmarrë. Ndërkohë, Partia Demokratike e Kosovës do të mblidhet në orën 14:30 , ku pritet të merret një vendim konkret. Gjasat janë që sot të dihet nëse vendi do të ketë një qeveri teknike deri në zgjedhjet e parakohshme, më 13 shkurt, ose do të shkohet me zgjedhje të jashtëzakonshme gjatë muajit dhjetor.
Presidenti në detyrë, Jakup Krasniqi ua ka lënë partive që të merren vesh ndërmjet vete, në mënyrë që ai më pastaj të vendosë se si do të veprojë.
I dërguari i BE-së, Robert Cooper, dje solli porosinë e përfaqësues së lartë për Politikë të Jashtme e Siguri, se nga Kosova kërkohet mbajtja sa më e shpejtë e zgjedhjeve. Edhe shefi i ICO-së ka shfaqur këtë opinion.