Kukës, 22 tetor – Rreth orës 11 e 30 minuta, sot u hap edhe krahu tjetër i tunelit të Kalimashit, që do të shpejtojë udhëtimin midis Prishtinës e Tranës, së paku për 20 minuta. Në ceremoninë e inaugurimit merrnin pjesë ministrat homologë të transportit nga Shqipëria e Kosova, Sokol Olldashi e Fatmir Limaj. Ishte i pranishëm edhe ish-ministri shqiptar i Transporteve, aktualisht monistër i Brendshëm i Shqipërisë, Lulëzim Basha. Po ashtu përveç përfaqësuesve të medieve nga të dy anët e kufirit shqiptar, merrnin pjesë edhe qytetarë nga Kosova e Shqipëria, që e prisnin me padurim hapjen e dy krahëve të tunelit.
Krahu verior i tunelit u hap pas përfundimit të të gjitha punëve, duke përfshirë edhe sinjalistikën, kamerat e sigurisë, ventilatorët, sistemet e alarmit dhe çdo gjë tjetër që duhet për ta bërë atë krejtësisht funksional. Pas hapjes së tunelit të dytë, udhëtarët nuk do të ndalen më në të dyja anët e tunelit për shkak të kalimit të automjeteve vetëm nga një korsi, me radhë.
Me hapjen e tunelit të dytë, kompania turko-amerikane "Bechtel-Enka" mbyll përfundimisht kantierin e saj në këtë rruge, pas tri vjetësh punime dhe do të shpërngulet në Kosovë, për t'iu bashkangjitur kantierit të ngritur atje, për vijimin e ndërtimit të autostradës nga Morina drejt Merdares.
Tuneli Thirrë-Kalimash, i hapur në një masiv shkëmbor, ka dy hyrje veriore dhe jugore, me nga 5.6 kilometra secila. Një vit e gjysmë më parë kanë qenë tre kryeministra, i Shqipërisë, i Kosovës dhe i Turqisë që kanë marrë pjesë në përurimin e tunelit të parë, por shembja masive brenda tij ndërpreu për muaj të tërë lëvizjen e automjeteve për arsye sigurie, derisa të riparohej dëmi i madh.
Miliona udhëtarë gjatë dy vjetëve që kur u hap pjesërisht autostrada Durrës-Kukës kanë kaluar nëpër këtë rrugë.