Prishtinë, 23 tetor - Aleanca Kosova e Re ka bërë të ditur se nota verbale për njohjen e Kosovës shtet nga Republika e Kiribatit, njohje të cilën një ditë më parë e paralajmëroi lideri i kësaj partie, Behgjet Pacolli në një konferencë për media, ka arritur të shtunën në Prishtinë, në zyrat e AKR-së.
Komunikata nga AKR-ja thekson se “kjo njohje vjen pas një punë intesive të Behgjet Pacollit dhe grupit të tij të bashkëpunëtorëve, në këtë vend. Presidenti i AKR-së, Behgjet Pacolli, është takuar më herët me krerët e shtetit të Kiribatit, me presidentin dhe kryeministrin e këtij vendi, ku edhe kishte marrë premtimin për njohje”.
Nota verbale që ka arritur në zyrat e AKR-së është përcjellë menjëherë te Ministria e Punëve të Jashtme të Kosovës. Për arsye të dorëheqjes së ministrit të Punëve të Jashtme, kjo njohje është dërguar në adresën e Ministrisë së Punëve të Jashtme të Kosovës, drejtuar zëvendësministres së Jashtme, Vlora Çitaku.
Njohja nga Kiribati dëshmon edhe njëherëë se lobimi i liderit të AKR-së, Behgjet Pacolli, po vazhdon me rezultate të reja të cilat janë të domosdoshme për shtetin e pavarur të Kosovës.