Prishtinë, 23 tetor - Partia Demokratike e Kosovës, nesër do të mbajë kuvendin e pestë zgjedhor. Në një konferencë për media, anëtari i kryesisë së kësaj partie, Enver Hoxhaj, tha se në tubimin e së dielës do të merren disa hapa të rëndësishëm. Në këtë kuvend pritet të miratohet raporti i punës, të bëhen ndryshimet e mundshme, të zgjidhet kryetari i ardhshëm i partisë, këshilli drejtues dhe të miratohet deklarata politike. Hoxhaj tha se nuk ka informatë nëse kryetari aktual i partisë, Hashim Thaçi do të ketë kundër-kandidat në zgjedhjet partiake. E duke folur për krizën institucionale dhe zgjedhjet e reja në nivel vendi, ai tha se Hashim Thaçi do të fitoj edhe një tjetër mandat si kryeministër i Kosovës.
“I takon Kongresit dhe delegatëve që nëse ka kandidatë të tjerë të kandidohen dhe propozohen në përputhje me statutin e PDK-së, i cili parasheh që duhet të ketë 30 nënshkrime për ndonjë kandidat të ri”, tha sekretari për marrëdhënie me publikun i PDK-së, Enver Hoxhaj, njëherësh ministër i arsimit.
Në konferencën e sotme për gazetarë, Hoxhaj i hodhi poshtë kritikat se Kongresi i partisë është një farsë, duke thënë se PDK para pesë muajve ka marrë vendim që të mbahet ky kongres i rregullt.
Subjektet politike në bazë të legjislacionit kosovar janë të obliguara t’i mbajnë kuvendet e tyre zgjedhore, nëse duan të certifikohen për të marrë pjesë në zgjedhje.