Rahovec, 23 tetor - Organizatat joqeveritare Syri i Vizionit nga Peja, bashkë me organizatat zvicerane Swiss Labour Assistance dhe Volkshilfe, të shtunën, në Rahovec kanë shpallur fituesit e garës për biznes planet më të mira në rajonin e Prizrenit dhe Gjakovës. Planet e biznesit të grave fermere nga Krusha e Madhe Rahovecit, Krusha e Vogël e Prizrenit dhe rrjeti Agrodukagjini janë përzgjedhur më të mirat, dhe projektet e tyre do financohen dhe përfundohen brenda një viti. Fituesit janë përzgjedhur pas një gare në të cilën kanë marrë pjesë 18 organizata nga komunat Prizren, Gjakovë e Rahovec.
Projekti është titulluar “Perspektiva rurale” dhe ka për qëllim zhvillimin e sektorit bujqësor në Kosovë, përkrahjen për organizatat fermere dhe inkurajimin e tyre për të konkurruar me ide të reja, për të zhvilluar kapacitetet e tyre dhe për t’u përshtatur dhe planifikuar në përputhje me nevojat e tregut. Tri projektet fituese përmbajnë ide për zhvillimin e prodhimeve bujqësore nëpër lokalitetet përkatëse: produktet nga specat në Krushë të Madhe, qumështit në Krushë të Vogël dhe për zhvillimin e bletarisë në Gjakovë.
Përkrahja e fermerëve përmes projektit “Perspektiva rurale” në rajonin e Dukagjinit këtë vit zhvillohet për herë të dytë. Në vitin 2008 në rajonin e Pejës janë përkrahur projekte tjera të pesë organizatave të fermerëve.