Prishtinë, 29 tetor – Drejtues të Aleancës Kosova e Re të enjten kanë adresuar kritika të shumta për ish-partnerët e koalicionit qeverisës PDK-LDK, për dëmet që po i shkaktojnë Kosovës në “lojën e tyre me fjalë”.
Por kësaj radhe kritikat janë adresuar edhe për drejtuesit e AAK-së së Ramush Haradinajt, për takimet sekrete me shefin e PDK-së, që është edhe kryeministër i Kosovës, Hashim Thaçi.
Zëvendëspresidentja e kësaj partie, Mimoza Kusari-Lila, duke folur për akuzat që po i bëhen partisë së saj për kryerje favoresh PDK-së së Thaçit, ka thënë se ata që po bëjnë akuza, vetë po shkojnë e po zhvillojnë takime sekrete me kryetarin e PDK-së.
Kusari-Lila ka vlerësuar se në takimet që po zhvillohen larg nga mediat, ndërmjet drejtuesve të Aleancës për Ardhmërinë e Kosovës dhe kryetarit të PDK-së, po diskutohet për poste pas zgjedhjeve.
“Partia opozitare AAK ka qenë ajo më e zëshmja në kritikat ndaj AKR-së për marrëveshje me PDK-në. E tani po del partia opozitare AAK, ajo e cila po merret vesh ose po bisedon me PDK-në për poste”, ka thënë kjo zyrtare e AKR-së.
Ajo ka shtuar se nëse në takimin e Blerim Shalës dhe të Ahmet Isufit nga AAK-ja me Hashim Thaçin e PDK-së nuk ka pasur asgjë të fshehtë për t’u biseduar, atëherë pse ai takim nuk është mbajtur në praninë e medieve (më gjerësisht sot në “Koha Ditore”).