Kompania e deminimit e Regjimentit të Mbrojtjes Civile (RMC) të Forcës së Sigurisë së Kosovës (FSK), ka përfunduar për ketë vit aktivitetin e deminimit humanitar (pastrimin e fushave të minuara), ndërsa vazhdon deri në fund të vitit kryerjen e detyrave për eliminimin e mjeteve të ndryshme eksplozive të pashpërthyera (EOD), dhe është në gatishmëri me kujdestari dymbëdhjetë orë çdo ditë. Pritet që pas certifikimit nga KFOR-i edhe të katër ekipeve, do të kalohet në kujdestari të plotë njëzet e katër orëshe.
Tri togje të Kompanisë së deminimit të aftësuara për deminim humanitar, kanë zhvilluar operacione të deminimit nga data 12 korrik 2010, dhe kanë përfunduar operacionet e tyre më 15 nëntor. Ekipet e deminimit të FSK-së kanë vepruar në këto vendbanime: Milaj, Ferizaj, Belincë, Harilaç, Vermicë dhe Koshare. Në të gjitha këto lokalitete, kanë pastruar një sipërfaqe prej 106.200 metra katror, si dhe kanë gjetur dhe shkatërruar 236 mjete të ndryshme eksplozive të pashpërthyera.
Operacionet e deminimit kanë përfunduar pasi që kushtet atmosferike në këtë periudhë nuk lejojnë të zhvillohen këto aktivitete, dhe të njëjtat operacione do të rifillojnë në pranverën e ardhshme, saktësisht sipas planit më 1 prill të vitit të ardhshëm.
Aksioni i deminimit në Kosovë bëhet nga njësitë e deminimit të FSK-së, në përputhje me standardet ndërkombëtare të Aksionit të Deminimit (IMAS). Qëllimi i aksionit të deminimit është që të reduktojë rrezikun nga minat dhe mjetet e pashpërthyera (MEP) në atë shkallë, sa që njerëzit të mund jetojnë sigurt, duke mundësuar zhvillimin e jetës normale për të gjithë qytetarët e Republikës së Kosovës
