Kabashi e njoftoi De Marnhacun për prioritetet e Kryeprokurorisë

Kryeprokurori i Shtetit, Ismet Kabashi e priti të enjten në një takim pune shefin e ri të misionit të BE-së për sundim të ligjit në Kosovës, EULEX, Xavier Bout de Marnhac.
Në këtë takim kryeprokurori Kabashi e njoftoi shefin e EULEX-it për prioritetet e tij si kryeprokuror i shtetit, për punën e prokurorive publike të Kosovës, për problemet dhe sfidat me të cilat ballafaqohen prokurorët vendës, si dhe për përfundimin e fazës së emërimit dhe riemërimit të prokurorëve, për këtë vit.

Kryeprokurori Kabashi edhe gjatë këtij takimi çmoi bashkëpunimin e ngushtë që kanë prokurorët vendës me prokurorët e EULEX-it.
Ndërkaq, De Marnhac, ka thënë se çështje kryesore për të do të jetë rivendosja e sundimit të ligjit në pjesën veriore të Kosovës, si dhe vazhdimi i luftës kundër korrupsionit dhe krimit të organizuar, dhe shprehu mbështetje të plotë për prokuroritë e Kosovës. “Unë plotësisht e mbështes dhe e vlerësoj lartë bashkëpunimin në mes të prokurorëve të Kosovës dhe të EULEX-it në trajtimin e rasteve të shumta”, ka thënë shefi i EULEX-it.

Të dyja palët u pajtuan që të thellojnë bashkëpunimin e tyre për të siguruar rend dhe sundim të ligjit në Kosovë.