Policia e Kosovës është njoftuar edhe zyrtarisht se i shumë kërkuari Enver Sekiraça tashmë gjendet nën kontrollin e Policisë së Irlandës. Reshat Maliqi, drejtori i përgjithshëm i Policisë së Kosovës, tha për portalin Zhurnal se informacionin që një person i tillë me emrin Enver Sekiraça, që ndodhet në afërsi të Dublinit në Irlandë, nga zyra e Interpolit në Prishtinë PK-ja e ka marrë para disa ditësh.
“Ne i kemi dorëzuar të gjitha të dhënat në lidhje me këtë rast dhe kemi kërkuar që ai person të ekstradohet në Kosovë, sepse dyshohet për kryerje të veprave të rënda penale”, tha Maliqi.
Sipas tij, me këtë çështje tash për tash është duke u marrë Ministria e Punëve të Jashtme, së bashku me Departamentin për Ekstradim, që vepron në kuadër të Ministrisë së Drejtësisë së Kosovës.
“Policia irlandeze na ka njoftuar se ka arrestuar një person me këtë emër e mbiemër, por janë edhe disa procedura që duhen respektuar, si marrja e gjurmëve të gishtërinjve dhe detaje tjera”, tha Maliqi.
I pyetur nëse është i mundur ekstradimi i Enver Sekiraçës, shefi i PK-së shpjegoi se lidhur me procedura ligjore merret Ministria e Drejtësisë dhe se policia vetëm ia dorëzon asaj dokumentacionin e nevojshëm.
Autoritetet policore të Kosovës janë në kërkim të Enver Sekariças që nga viti 2007, pas vrasjes së policit Triumf Riza, në gusht të atij viti.
Sekiraça, i kërkuar nga Interpoli, akuzohet gjithashtu dhe për një sërë veprash të tjera penale, si anëtar i krimit të organizuar ndërkombëtar, abuzime seksuale, vrasje dhe plagosje.

Drejtesia fiton gjithmon :)