Kryetari i Partisë Demokratike të Kosovës, Kryeministri i Republikës së Kosovës, Hashim Thaçi, i shoqëruar nga zëvendëskryeministri Hajredin Kuçi, ministri i Transportit dhe Postë-Telekomunikacionit, Fatmir Limaj dhe ministrja e Energjisë dhe Minierave, Justina Shiroka-Pula ka marrë pjesë në takimet parazgjedhore të PDK-së nw Malishevw, Rahovec dhe Prizren.
Në tubimin e mbajtur në Malishevë, para mijëra anëtarëve dhe simpatizantëve të Partisë Demokratike të Kosovës, kryeministri Hashim Thaçi theksoi:
“Ishim bashkë në betejat për liri, bashkë e arritwm pavarësinë e Kosovës, tani jemi përsëri bashkë për fitoren e re të thellë të Partisë Demokratike të Kosovës, në rrugën e integrimit të Republikës së Kosovës në institucionet euro-atlantike”.
“Gjatë tri viteve të kaluara ne e ndryshuam Kosovën, e ndryshuam edhe Malishevën. Ne ndërtuam rrugë të asfaltuara anë e kënd Kosovës, ndërtuam shkolla të reja, ndërsa po jetësojmë edhe ëndrrën e kamotshme të qytetarëve të Kosovës – ndërtimin e autostradës Vërmicë-Prizren-Prishtinë-Merdarë” – u shpreh z.Thaçi në Malishevë.
“Ne e nxorëm Kosovën nga balta dhe për këtë sukses ka meritë të madhe ministri dhe bashkëqytetari juaj, z.Fatmir Limaj” – theksoi më tej kryetari i PDK-së, kryeministri Hashim Thaçi dhe shtoi se “ne arritëm që çdo qytetar i Republikës së Kosovës të ndihet mirë në qytetin e vet, në shtetin e vet, andaj kërkoj që të votoni 100 për qind për Partinë Demokratike të Kosovës” – tha z.Thaçi.
“Ne po vazhdojmë me ngritjen e pagave të të gjitha kategorive të shoqërisë kosovare, arsimtarëve, policëve, minatorëve, ndërsa tani po fillon edhe implementimi i plotë i Ligjit për vlerat e luftës dhe tani e tutje do të ketë trajtim dinjitoz institucional për veteranët, invalidët dhe familjet e dëshmorëve” – tha kryeministri Thaçi në takimin parazgjedhor në Malishevë.
Ndërsa, nënkryetari për çështje politike i PDK-së, ministri i MTPT-së, Fatmir Limaj ka theksuar se në Malishevë gjatë këtyre viteve të qeverisjes së PDK-së kanë ndodhur zhvillime të mëdha pozitive, janë ndërtuar shumë rrugë, është investuar në infrastrukturë në çdo cep të komunës sonë.
“Çdo qytetar i komunës së Malishevës çdo ditë e sheh punën dhe suksesin e PDK-së në Malishevë dhe në gjithë Kosovën, prandaj për ne flet puna jonë, e jo fjalët boshe” – tha z.Limaj.
Në takimin elektoral të PDK-së në Malishevë është bërë edhe prezantimi i kandidatëve të PDK-së për Kuvendin e Kosovës nga ky rajon: Fatmir Limaj, Haxhi Shala, Hasime Mazrreku-Krasniqi, Halit Krasniqi dhe Enver Hoti.
Gjatë ditës, kryetari i Partisë Demokratike të Kosovës, Hashim Thaçi ka marrë pjesë edhe në tubimin elektoral të PDK-së në Rahovec.
Në këtë takim, kryeministri Thaçi iu ka bërë thirrje anëtarëve dhe simpatizantëve të PDK-së për të zhvilluar një fushatë të qetë, të lirë dhe demokratike, të prezantimit të ideve dhe projekteve konkrete të kandidatëve të PDK-së.
Në vazhdim, kryeministri Thaçi ka apeluar tek anëtarësia e PDK-së për të zhvilluar betejë politike për të fituar, por edhe për të ruajtur çdo votë të Partisë Demokratike të Kosovës në Rahovec.
“Partia Demokratike e Kosovës është dëshmuar gjithmonë që mbi interesin e vet, ka interesat madhore të Kosovës, prandaj jo rastësisht motoja jonë është SË PARI KOSOVA, për dallim që çuditërisht partitë tjera kanë së pari interesin e tyre, pastaj Kosovën” – u shpreh z.Thaçi.
“Kërkojmë nga ju që ta votoni fuqishëm PDK-në, në mënyrë që të krijojmë një fitore të thellë, që do të na siguronte një mazhorancë të sigurt, stabile, që do të garantonte fuqizimin e qeverisjes së mirë, efektive, transparente, në shërbim të të gjithë qytetarëve të Kosovës” – theksoi kryetari i PDK-së, Hashim Thaçi.
Në tubimin elektoral të PDK-së në Rahovec, kryeministri Thaçi ka shprehur mbështetje për kandidatët e PDK-së nga Rahoveci, z.Idriz Vehapi dhe z.Rexhep Hoti.
Kryeministri Thaçi ka marrë pjesë sot edhe në disa takime me qytetarë në Prizren.
Kryeministri Thaçi u prit ngrohtë në një tubim nga sportistët dhe shoqatat kulturo-artistike të rajonit të Prizrenit në Hotelin Luxor në Prizren. Kryeministri Thaçi theksoi se ndihet shumë mirë në siç tha kryeqytetin e kulturës shqiptare, në Prizren. Ndërsa për sportistët kosovarw kryeministri Thaçi tha se ka agjendë të qartë të avancimit dhe ndërkombëtarizimit të aktiviteteve të tyre, duke i premtuar ata se sporti kosovar do të jetë i përfaqësuara denjësisht në Garat Olimpike Londra 2012.
Gjatë qëndrimit në Prizren, Kryetari i PDK-së, vizitoi edhe Fabrikën e prodhimit të bukës në Prizren, si dhe mori pjesë në një tubim me qytetarë në fshatin Qëndresë.