Nga kompania Casio na vjen një fotoaparat i cili është i rezistueshëm ndaj goditjeve, pluhurit, ujit dhe ngricave, por për dallim nga shumica e pajisjeve të këtij lloji, nuk është tepër i madh e as i pahijshëm.



Casio EX-G1 aspak nuk duket si një pajisje e cila mund të duroj çfarëdo keqtrajtimi, mirëpo në Casio pohojnë se mund ta rrihni, ngrini, ta lagni me ujë dhe ta hidhni në pluhurin më të madh pa i shkaktuar pasoja.

Krejt kjo vjen në një shtëpizë gjithsej 0.78 inç (rreth 2 centimetra), që e bën këtë pajisje fotoaparatin më të hollë të këtij lloji në treg.

Nga specifikat tjera veçojmë sensorin e rezolucionit prej 12.1 megapikelash, auto-fokus, incizim të video materialeve me rezolucion 848 x 480 piksela, objektiv të trefishtë optik, 35.7 MB memorie të integruar (zgjerohet edhe më shumë me kartela microSD, apo microSDHC) si dhe ekran LCD me diagonale prej 2.5 inç.

Krejt këto nuk do të kushtojnë edhe tepër. Pajisja do të paraqitet këtë dhjetor me çmim prej 300 dollarësh, me ngjyrë të kuqe dhe të zezë.