Inteli ka prezentuar pajisjen mobile e cila do t'u ndihmojë të verbërve dhe atyre me shikim të dobësuar të cilët kanë disleksion për të "lexuar" tekstin të cilin përndryshe nuk do të mund ta lexonin, gjegjësisht do të kishin problem me të lexuar. Kjo pajisje, e quajtur Intel Reader, shfrytëzon kombinimin e Point-and-shoot kamerës dhe teknologjisë e cila shndërron tekstin në audio, gjegjësisht në zë elektronik. Aparati shfrytëzohet ashtu që drejtohet kah teksti i caktuar, libri ose shenja, në mënyrë që "caku" të fotografohet nga kamera me autofokus e cila ka pesë megapixelë e integruar në këtë aparat, dhe më pas Readeri "lexon" fotografinë duke shfrytëzuar zërin femëror ose mashkullor. Zëri mund të dëgjohet përmes altoparlantëve të integruar ose përmes kufjeve të cilat mund të lidhen në Reader. Përveç këtyre, aparti ka edhe ekranin me 4.3" i cili shërben për personat me shikim të dobësuar që të mund të lexojnë tekstin, pasi që aparati ua rrit fontin i cili është adekuat për lexim. Përveç fotografimit të tekstit, shfrytëzuesit mund ta lidhin aparatin në kompjuter përmes USB-së, dhe në të të bartin libra dhe tekste tjera nga kompjuteri të cilët Readeri i konverton në audio. Përveç këtyre, në këtë aparat mund të barten edhe librat në format audio, të cilat më pas mund të dëgjohen në të. Si duket Readeri i ka të gjitha përveç çmimin të volitshëm. 1499 dollarë për këtë aparat mund të jetë tepër shumë për disa persona.